ВЕЛИКОМУЧЕНИЦА ЕКАТЕРИНА АЛЕКСАНДРИЙСКАЯ
ВЕЛИКОМУЧЕНИЦА ВАРВАРА ИЛИОПОЛЬСКАЯ
ВЕЛИКОМУЧЕНИЦА ЕКАТЕРИНА АЛЕКСАНДРИЙСКАЯ
Кондак 1
Избранную и венчанную деву мученицу, невесту Христову Екатерину, похвальными песньми воспоим, яко преславную мучителя победительницу и премудрую философов наставницу: ты же, великомученице Екатерино, имущи дерзновение ко Господу, приклонися милостивне к благопотребным прошениям зовущих ти: Радуйся, Екатерино, невесто Христова премудрая.
Икос 1
Ангелом равную чистоту имущи, святая дево Екатерино, с Ангелы Божественнаго озарения сподобилася еси, с ними же воспевающи Трисвятую песнь, услыши нас, поющих тебе на земли сия: Радуйся, честное святыни жилище; радуйся, чудесное знамение сбывшагося на тебе Божия Промысла. Радуйся, благоволения Отча сосуде; радуйся, страданий Христовых исполнение. Радуйся, чистое Духа Святаго обиталище; радуйся, светом благочестивыя веры просветившаяся. Радуйся, святою купелию отрожденная; радуйся, измывшая ризы своя в Крови Агнчей на земли. Радуйся, ликующая со священными девами на Небеси. Радуйся, Екатерино, невесто Христова премудрая.
Кондак 2
Видящи Екатерина себе видения сподобльшуюся, тече к святому старцу, икону ей Богоматере прежде того вручившему, и поведа ему, како отвращаше лице Свое ей явивыйся с Пречистою Своею Материею Христос, како безумну и нищу и худородну ю нарек, дондеже не оставит идольскаго нечестия. Преподобный же, слышав сия, настави ю в таинствах веры и крести ю. Она же во обновлении духа благодарно пояше Богу: Аллилуиа.
Икос 2
Разум благий, благородство истинное, богатство негиблющее стяжавши в духовном отрождении святая Екатерина достойна явися Небеснаго Жениха Христа, Иже, паки явився ей, возлюби ю и дарованным перстнем в невесту Себе обручи. Она же, познавши такое к ней благоволение Божие, тако уязвися любовию Его, яко не мудрствоваше более о земных вещах, но о Возлюбленном своем непрестанно мысляше. Таковой благодати сподобльшаяся слыши от нас: Радуйся, зловоние мирское возненавидевшая; радуйся, в воню мира Христова текущая. Радуйся, добрая любительнице Жениха Безсмертнаго; радуйся, сокровище благоволения Вышняго. Радуйся, деннице пресветлая; радуйся, луна совершенная. Радуйся, маслина, в дому Божии насажденная, радуйся, кедр в Ливане высокорасленный. Радуйся, Екатерино, невесто Христова премудрая.
Кондак 3
Сила Вышняго даде тогда святей Екатерине дерзновение, еже нечествующаго царя Максимина о принесении идолом жертв обличити небоязненно, и той пребысть безгласен на мног час, не могий противитися ея глаголам. Она же, благодарящи Бога, воспеваше: Аллилуиа.
Икос 3
Имущи святая Екатерина свыше данную ей премудрость, егда нечестивый царь, постави пред собою, вопрошаше ю о роде ея и сане, она исповеда себе быти дщерь царскую, философския и риторския науки добре изучившую, паче же Христову невесту себе наименова, в явное отвержение идольскаго служения. Радуйся, убо, Екатерине преславная; радуйся, царское священие. Радуйся, пчело, дыма идольскаго отлетевшая; радуйся, голубице, златы крила имущая. Радуйся, кадило Христова благоухания. Радуйся, Екатерино, невесто Христова премудрая.
Кондак 4
Бурею ярости вознеистовився царь на святую деву, рече к ней: «Не глаголи зле о бозех наших». Святая же Екатерина отвеща: «Аще восхощеши отрясти мрак прелести уразумееши богов твоих худость и познаеши истиннаго Бога, Егоже имя токмо глаголемое, или крест, изобразуемый на воздусе, прогоняет боги твоя и погубляет. И аще повелиши, явлю тебе истину, поющи Богу: Аллилуиа».
Икос 4
Слышав нечестивый царь свободный и мудрый ответ твой о вере Христовой, убоявся, да не будет побежден от тебе, собра от пределов державы своея мудрецов, числом пятдесят, на прение. Ты же, Архангелом Михаилом утвержденная и о победе уверенная, возрадовалася еси вступити в прение с ними. Приими убо, дево, от нас похвалу сию: Радуйся, изъявительнице ума Христова; радуйся, херувимское стяжавшая Богопознание. Радуйся, Серафимскою воспаленная к Богу любовию; радуйся, мудрых мудрейшая. Радуйся, духовный меч на неверие изострившая; радуйся нечестия прогонительнице. Радуйся верных наставнице. Радуйся, Екатерино, невеста Христова премудрая.
Кондак 5
Боготечной звезде была еси подобна, Екатерино, препревши пятдесят ветий и наставивши их на путь христианский, ведущий к праведному Солнцу, от Девы возсиявшему Христу Богу, своими мудрыми глаголы, иже и осуждени бывше за Христа на сожжение и напутствовани молитвою твоею, с радостию идоша в огнь, поюще: Аллилуиа.
Икос 5
Видев царюющий повеления своя в тебе пренебреженны и увещания презренны, обратися к лукавству, еже ласканием прельстити тя, обещая полцарства тебе дати. Ты же веру сокровищам земным предпочетши и Жениха Христа возлюбивши паче земнаго царства и одежду мученичества паче багряницы, отвергла еси его суесловие. Сего ради восписуем ти сия похвальная: Радуйся, дево, лесть обличившая; радуйся, запинателя змия поправшая. Радуйся, дщерь царева; радуйся, дево, рясны златыми одеянная. Радуйся, всякое вещество превозшедшая; радуйся, на гору боговидения востекшая. Радуйся, светом богопознания просвещенная; радуйся, труба духа, воспевшая глас истиннаго богословия. Радуйся, доброе веры исповедание; радуйся, света евангельскаго сияние. Радуйся, законов вечных хранительнице; радуйся, наша помощнице. Радуйся, Екатерино, невесто Христова премудрая.
Кондак 6
Проповедником богоносным, апостолом поревновавши, дерзновенно пред лицем мучителя проповедала еси Христа, истиннаго Бога, Емуже в ранах и в темнице пела еси: Аллилуиа.
Икос 6
Возсиявый в сердце твоем свет истиннаго богоразумия отгнал есть мрак скорбей, иже не остави тя алкати, голубицею пищу ти посылая, ниже стужати о болезни, посетил бо Сам тя в темнице, ободряя и многи венцы обещавая. Ты же, терпеливодушная, сим паче укрепилася еси и царицу Августу и воеводу Порфириа, с воины притекших к тебе, обратила еси к свету веры Христовой и научила, пети тебе сия: Радуйся, мироположнице Божественныя любве; радуйся, адаманте крепкий. Радуйся, вина чудес неизреченных; радуйся, врага терпением убившая. Радуйся, язвы Господа на теле своем носившая; радуйся, царице Августе с пришедшими к мученическому подвигу путенаставнице. Радуйся, яко во тьме свет была еси; радуйся, яко Сам Господь, Свет мира, тебе, в темнице бывшей, Себе явил есть. Радуйся, уз греховных скорая решительнице; радуйся, болезнующих скорая целебнице. Радуйся, помощнице нашего спасения. Радуйся, Екатерино, невесто Христова премудрая.
Кондак 7
Хотящу безбожному царю привести тя к мерзкому идолослужению, паки сети подстилает тебе, премудрая, еже уловити тя лестно похвалою красоты твоея; ты же красоту вещь привременну и скоропреходну именовала еси, Христа же исповедала еси Бога жива и истинна и пела ему: Аллилуиа.
Икос 7
Новую показа царь ярость и безчеловечие, повелев епарху колесами растерзати девственное, чистое и святое тело твое, но чудесно рукою Ангела абие разрешена была еси безвредна и колеса на части сокрушены, имиже многи от неверных убиены, яко удивися сам царь и предстоящий народ, иже и взываше: «Велик Бог христианский». Мы же, чудящеся сему, взываем тебе: Радуйся, мученице, Ангелом честная и говейная; радуйся, слава полков страдальческих. Радуйся, светлая на враги победа; радуйся, страх неверных. Радуйся, сосуде множайшия силы Божия; радуйся, радование верных. Радуйся, Екатерино, невесто Христова премудрая.
Кондак 8
Странное славы изменение и за Христа страдание царицы и воеводы с воины видевше, устранимся любве мира и плоти и вперим себе к разумению Бога, Сей бо есть красота, и слава, и венец нам, поющим: Аллилуиа.
Икос 8
Весь сладость, весь желание тебе, святая Екатерино, бысть Иисус: сладце бо Его ради горькия муки терпела еси и скипетр, предлагаемый тебе, попрала еси, предзрящи будущее воздаяние. От нас же приими похвальная сия: Радуйся, чистая, чисте Чистаго возлюбившая; радуйся, горлица, Краснаго Жениха в пустыне дольнаго мира вожделевшая. Радуйся, воню риз Его благоухавшая; радуйся, яко серна на горах ароматских искавшая Рожденнаго прежде холмов вечных. Радуйся, подвиг страдальческий ради любве Христовы совершившая; радуйся, лик мученический Богу приведшая. Радуйся, яко ветии тобою получиша Царство Небесное; радуйся, яко тоеже тобою получити чаем. Радуйся, покров и забрало наше. Радуйся, Екатерино, невесто Христова премудрая.
Кондак 9
Все естество ангельское возрадовася радостию, зря тя, Екатерино, победивши миродержца, шествующую к премирным яко победоносную воеводу, в последовании полка страдальческаго, и воспе победная, взывая: Аллилуиа.
Икос 9
Ветия многовещанныя заустишася: не возмогше бо противовещати богодухновенным словесем твоим, молчанием почитают дарования твоя; мы же, немощнии, како можем отверсти уста на хвалы твоя? Однако дерзаем и молим, сподоби, благая, безбедно принести тебе песнь сию: Радуйся, органе Духа Святаго; радуйся, заре неизреченнаго осияния. Радуйся, догматов Божественных пучина; радуйся, хитросте, препревшая философов. Радуйся, чаше премудрости; радуйся, плетения ветий растерзавшая. Радуйся, пленицы греховныя разрешающая. Радуйся, Екатерино, невесто Христова премудрая.
Кондак 10
Спасти хотящи душу твою, о теле твоем нерадила еси, Екатерино, и на мечное усечение, мучителю давшу на то изречение, ты радостно потекла еси, поющи Святому Безсмертному: Аллилуиа.
Икос 10
Стена тверда и непреодолима явилася еси женам, тебе на место усечения провождаюшим и с рыданием тя жестокосерду к себе и безразсудну быти именующим: яко не пощадила еси сладкаго живота в цвете юности, яко презрела еси земное предлагаемое царство и блаженство. Ты же воспретила еси неполезный плач их и суесловие, текущи скорейше соединитися чрез смерть со своим Возлюбленным, того ради слышиши: Радуйся, радостно за Главу Церкве Христа под меч главу свою приклонившая; радуйся, до конца претерпевшая. Радуйся, течение добре скончавшая; радуйся, яко ни скорбию, ни ранами, ни мечем с пути Христова исповедания не совратилася еси. Радуйся, яко пламень любве в источнице крове неугасим соблюдшая; радуйся, мучеников красото. Радуйся, крепкое христиан прибежище. Радуйся, Екатерино, невесто Христова премудрая.
Кондак 11
Пение похвальное дерзнухом принести тебе, но оскудевает слово наше и недоумевает ум, како глаголати; обаче слово твое премудрое, многих похитившее от невежества и идолонечестия, возставляет нас. Даждь нам слово твое, во еже пети удивльшему на тебе величия Своя Богу: Аллилуиа.
Икос 11
Светоприемную тя свещу, мечным усечением погашенную, но на свещнице Небеснем пред Престолом Святыя Троицы поставленную, видевше святии Ангели, поклонишася Живущему во веки и, получивше от Владыки повеление, девственное тело твое на горе Синайстей погребоша, да не видимо будет, якоже сама хотела еси, врагом Господним. Мы же песнь сию возсылаем ти: Радуйся, солнцеобразная дево, на Небеса духом возшедшая; радуйся, Сиона Горняго достигшая. Радуйся, венче доброты в руце Господни; радуйся, чаше, от обилия дому Божия черплющая радость. Радуйся, к скинии нерукотворенней, вечней приближившаяся; радуйся, на горе законней почивающая телом. Радуйся, яко тамо видена быша шествия Бога Синаина, Бога Иаковля; радуйся, места боговидения Моисеова одержание. Радуйся, ревности Илиины указание; радуйся, купины несгораемой явление. Радуйся, дево, Деве Царице, в ризы позлащенны одеянной, преиспещренной вследствующая; радуйся, яко тобою Сый воспевается посреде дев тимпанниц. Радуйся, яко на тебе велелепота Его; радуйся, Престола Вечнаго предстоятельнице. Радуйся, от храма вселенныя молитвенники к тебе назирающая; радуйся, кадило молитв Вышнему о нас благоприятное. Радуйся, Екатерино, невесто Христова премудрая.
Кондак 12
Благодать дана тебе от Бога руководствовати к познанию истины Его, в тайне сокровенней, и даяти всем яже к пользе прошения. Темже мы, помраченнии, умиленно просим тя, мудрая дево: просвети умныя наши очи и положи нам к Небеси стезю проходну, да поем с тобою ныне и во вся веки Единому Премудрому: Аллилуиа.
Икос 12
Поюще крепкия твоя мученическия подвиги, хвалим тя, яко одушевленный сосуд спасения человеков: твоим бо разумом Бог премудрость премудрых века сего погуби; тобою ветий призва в язык свят, в люди обновления, яко тем страдати за Христа. Просвети и нас, благая дево, помраченных, да зовем ти: Радуйся, зерцало Божия мудрости; радуйся, силою Вышняго одеянная. Радуйся, подвижнице, елеем радования умащенная; радуйся, воеводо, полк Божий к вечному величеству предпославшая. Радуйся, во светлости святыя вшедшая; радуйся, во свете неприступном Живущему в лице пламенных слуг представшая. Радуйся, гром трисвятаго пения гласом своим умножающая; радуйся, неизреченную сладость доброты вкушающая. Радуйся, яко хвала и радование над главою твоею; радуйся, яко вечная слава тебе объемлет. Радуйся, от Триипостаснаго Божества венцем Небеснаго Царствия увенчанная; радуйся, благодати и безконечной славы нам ходатаице. Радуйся, Екатерино, невесто Христова премудрая.
Кондак 13
О святая великомученице Екатерино! Приими сие похвальное пение и избави нас от враг видимых и невидимых и от вечнаго мучения твоим благоприятным ходатайством сохрани, да с тобою присно поем Богу: Аллилуиа. ТРИЖДЫ
Икос 1
Ангелом равную чистоту имущи, святая дево Екатерино, с Ангелы Божественнаго озарения сподобилася еси, с ними же воспевающи Трисвятую песнь, услыши нас, поющих тебе на земли сия: Радуйся, честное святыни жилище; радуйся, чудесное знамение сбывшагося на тебе Божия Промысла. Радуйся, благоволения Отча сосуде; радуйся, страданий Христовых исполнение. Радуйся, чистое Духа Святаго обиталище; радуйся, светом благочестивыя веры просветившаяся. Радуйся, святою купелию отрожденная; радуйся, измывшая ризы своя в Крови Агнчей на земли. Радуйся, ликующая со священными девами на Небеси. Радуйся, Екатерино, невесто Христова премудрая.
Кондак 1
Избранную и венчанную деву мученицу, невесту Христову Екатерину, похвальными песньми воспоим, яко преславную мучителя победительницу и премудрую философов наставницу: ты же, великомученице Екатерино, имущи дерзновение ко Господу, приклонися милостивне к благопотребным прошениям зовущих ти: Радуйся, Екатерино, невесто Христова премудрая.
ВЕЛИКОМУЧЕНИЦА ВАРВАРА ИЛИОПОЛЬСКАЯ
Конда́к 1.
Избра́нной Бо́гом от идолослужи́тельнаго ро́да и призва́нной во язы́к свя́т, в лю́ди обновле́ния, неве́сте Христо́ве, я́ко избавля́ющиися тобо́ю от разли́чных зо́л и обстоя́ния, благода́рственная пе́ния и хвале́ния воспису́ем ти́, моли́твенницы твои́, свята́я и всехва́льная великому́ченице: ты́ же, иму́щи дерзнове́ние ко Го́споду, от вся́ких на́с бе́д свободи́, да с ра́достию зове́м ти́:
Ра́дуйся, Варва́ро, неве́сто Христо́ва прекра́сная.
И́кос 1.
А́нгелов честну́ю и вселюбе́зную чистоту́ непоро́чно сохра́нши, честна́я Варва́ро, а́нгелом сожи́тельница бы́ти сподо́билася еси́, с ни́миже егда́ пое́ши тро́ическую пе́снь Бо́гу на небеси́, услы́ши на́с, пою́щих тебе́ на земли́ похва́льная пе́ния сия́:
Ра́дуйся, отрокови́це, Бо́гом Отце́м предуста́вленная бы́ти сообра́зна в страда́нии о́бразу Сы́на Его́; ра́дуйся, Сы́ном Бо́жиим, Све́том от Све́та, призва́нная из тмы́ в чу́дный све́т ве́ры и благода́ти Его́.
Ра́дуйся, я́ко позва́вшему тя́ Свято́му Ду́ху, и сама́ те́лом и ду́хом свята́ еси́; ра́дуйся, я́ко от скве́рны пло́ти и ду́ха непоро́чну тя́ соблюла́ еси́.
Ра́дуйся, рожде́нному от Де́вы Жениху́ Христу́ де́ву тя́ чи́стую обручи́вшая; ра́дуйся, земна́го обру́чника па́че Небе́снаго зна́ти не восхоте́вшая.
Ра́дуйся, кри́не де́вства, посреде́ те́рния и́дольскаго прора́стший до́ле; ра́дуйся, цве́те чистоты́, в неувяда́емой сла́ве цвету́щий горе́.
Ра́дуйся, в небе́сном вертогра́де Христо́ва благоуха́ния наслажда́ющаяся; ра́дуйся, Красне́йшаго па́че сыно́в челове́ческих зре́нием та́мо утеша́ющаяся.
Ра́дуйся, убели́вшая ри́зы твоя́ в Кро́ви А́гнчей на земли́; ра́дуйся, в ли́це де́вственном после́дующая Бо́жиему А́гнцу на небеси́.
Ра́дуйся, Варва́ро, неве́сто Христо́ва прекра́сная.
Конда́к 2.
Ви́дящи свята́я Варва́ра себе́ на высо́ком столпе́ от отца́ поста́влену, помышля́ше себе́ ма́нием Бо́жиим к небеси́ бы́ти возводи́му. Разу́мная у́бо восхожде́ния в се́рдце свое́м поло́жши, те́ми от тмы́ ко Све́ту и от преле́стных и́долов ко И́стинному Бо́гу у́мне восхожда́ше, пою́щи Ему́: Аллилу́иа.
И́кос 2.
Ра́зум неуразуме́нный о Еди́ном всея́ тва́ри Творце́ разуме́ти де́ва свята́я Варва́ра и́щущи, бесе́доваше со свои́м си́ ра́зумом, глаго́ля: от те́мных куми́ров чу́дным свети́лам небе́сным ка́ко бе́ созда́тися мо́щно, рцы́ ми́? К не́йже о́н со псало́мником рече́: вси́ Бо́зи язы́к бе́сове, Еди́н же е́сть Бо́г и Госпо́дь, И́же небеса́ и вся́ свети́ла и́х сотвори́. Таково́му твоему́, му́драя де́во, ра́зуму дивя́щеся, глаго́лем:
Ра́дуйся, па́че ста́рец идолослужи́тельных разу́мнейшая; ра́дуйся, па́че мудреце́в ми́ра сего́ мудре́йшая.
Ра́дуйся, я́ко тебе́ безве́стная и та́йная прему́дрости Своея́ Бо́г яви́л е́сть; ра́дуйся, я́ко тебе́ и́стиннаго богосло́вия Са́м Бо́г Сло́во научи́л е́сть.
Ра́дуйся, все́х звездоче́тцев умо́м Христо́вым превозше́дшая; ра́дуйся, я́вственнее па́че о́нех небе́сный кру́г прозре́вшая.
Ра́дуйся, я́ко в тва́ри, а́ки в зерца́ле, Самаго́ Творца́ усмотре́ла еси́; ра́дуйся, я́ко в созда́нных свети́лах Несозда́нный Све́т узре́ла еси́.
Ра́дуйся, ны́не уже́ кроме́ зерца́ла све́т лица́ Бо́жия на небеси́ зря́щая; ра́дуйся, те́м све́том неизрече́нно веселя́щаяся.
Ра́дуйся, у́мная звездо́, ея́же озаре́нием лице́ Бо́жие, я́ко со́лнце, све́тло на́м явля́ется; ра́дуйся, мы́сленная луно́, е́юже но́щь заблужде́ния я́ко де́нь просвеща́ется.
Ра́дуйся, Варва́ро, неве́сто Христо́ва прекра́сная.
Конда́к 3.
Си́ла Вы́шняго даде́ тогда́ святе́й Варва́ре, я́коже дре́вле проро́ку Иезеки́илю, лице́ адама́нтово, си́льно пред все́ми идолослужи́тельми, во е́же не убоя́тися е́й от зве́рскаго лица́ и́х, ни ужаса́тися лю́таго преще́ния. Те́мже со дерзнове́нием мужему́дренная де́ва взыва́ше: Тро́ицу чту́, Еди́но Божество́, и То́й ве́рою покланя́ющися, велегла́сно пою́: Аллилу́иа.
И́кос 3.
Иму́щи свята́я Варва́ра свы́ше да́нную себе́ му́дрость, востече́ к де́лателем ба́ни оте́ческия, и о́нем проявля́я та́йну Святы́я Тро́ицы, повеле́ три́ о́кна в ба́не устро́ити. А́ще, — рече́, — идолослужи́телие уста́ и́мут и не глаго́лют сла́вы и́стиннаго Бо́га, то ка́менныя в се́й ба́не сте́ны треми́ о́кнами, а́ки треми́ устна́ми, да свиде́тельствуют, я́ко Еди́н е́сть Бо́г, в Тро́ице Святе́й от всея́ тва́ри сла́вимый и покланя́емый. За таково́е у́бо мудрова́ние, свята́я Варва́ро, приими́ похвалу́ сию́:
Ра́дуйся, в трео́конной ба́не купе́ль свята́го креще́ния, во и́мя Тро́ицы Пресвяты́я, изобрази́вшая; ра́дуйся, в купе́ли воды́ и Ду́ха, к си́м же и кро́ве твоея́ му́ченическия, тебе́ измы́вшая.
Ра́дуйся, я́ко треми́ о́кнами тму́ многобо́жия, Тро́ице Святе́й проти́внаго, прогна́ла еси́; ра́дуйся, я́ко о́кнами треми́ Све́т Тро́ический я́сно узре́ла еси́.
Ра́дуйся, я́ко те́ми треми́ о́кнами призре́ на тя́ Со́лнце Пра́вды, тридне́вно возсия́вшее от гро́ба; ра́дуйся, я́ко те́ми тебе́ возсия́ де́нь Тро́ическаго спасе́ния.
Ра́дуйся, се́рдце твое́ Еди́ному в Тро́ице Бо́гу всегда́ отве́рсто име́вшая; ра́дуйся, чу́вства твоя́ пред бра́нию трие́х враго́в: пло́ти, ми́ра и диа́вола, кре́пко заключи́вшая.
Ра́дуйся, я́ко в души́ твое́й три́ мы́сленная о́кна: ве́ры, наде́жды и любве́, устро́ила еси́; ра́дуйся, я́ко те́ми треми́ о́кнами при Тро́ическом Божестве́ треми́ де́ньми воздви́женную Те́ла Христо́ва Це́рковь усмотре́ла еси́.
Ра́дуйся, я́ко тебе́ небеса́ от трие́х иера́рхий а́нгельских отверзо́шася; ра́дуйся, я́ко тебе́ го́рния оби́тели Тро́ическия ра́достно прия́ша.
Ра́дуйся, Варва́ро, неве́сто Христо́ва прекра́сная.
Конда́к 4.
Бу́ря я́рости ве́лия отца́ твоего́, ды́шущаго преще́нием и уби́йством, возшуме́ на хра́м души́ твоея́, свята́я Варва́ро, но того́ не возмо́же поколеба́ти: основа́н бо бе́ на тве́рдом ве́ры Христо́вы ка́мени, на не́мже ты́, му́драя де́во, неподви́жимо стоя́щи, укрепля́ющему тя́ Иису́су Христу́ пе́снь воспева́ла еси́: Аллилу́иа.
И́кос 4.
Слы́шав от тебе́, му́дрыя дще́ри, оте́ц тво́й Диоско́р неслы́шанная о Святе́й Тро́ице словеса́, я́ко а́спид глухи́й затка́ у́ши своя́ и по подо́бию змии́ну с жа́лом ядоно́сным устреми́ся со о́стрием меча́ на твое́ уби́йство; но ты́, неве́сто Христо́ва Варва́ро, подража́ющи Жениха́ твоего́ Иису́са, бежа́вшаго от меча́ И́родова, бе́гала еси́ от меча́ Диоско́рова, жела́ющи се́рдце его́ от зве́рския я́рости в любо́вь оте́ческую обрати́ти. Мы́ же разу́мное твое́ бе́гство зва́нии почита́ем си́ми:
Ра́дуйся, блаже́нная, изгна́нная из до́му земна́го пра́вды ра́ди; ра́дуйся, бога́тая в Бо́га, лише́нная оте́ческих бога́тств Христа́ ра́ди.
Ра́дуйся, я́ко твоего́ обнища́ния е́сть Ца́рствие небе́сное; ра́дуйся, я́ко тебе́ угото́вася ве́чных бла́г сокро́вище.
Ра́дуйся, слове́сная а́гнице, от зла́го во́лка мучи́теля к До́брому Па́стырю Христу́ прибе́гшая; ра́дуйся, во дво́р пра́ведных ове́ц Его́, одесну́ю стоя́щих, вше́дшая.
Ра́дуйся, незло́бивая голуби́це, от земна́го вра́на в покро́в небе́снаго Орла́ прелете́вшая; ра́дуйся, в кро́ве крилу́ Его́ до́брый тебе́ покро́в обре́тшая.
Ра́дуйся, Небе́снаго Отца́ дщи́ честна́я, я́ко от земна́го роди́теля с безче́стием на сме́рть гони́ма была́ еси́; ра́дуйся, я́ко от безсме́ртнаго Го́спода Сла́вы в жи́знь ве́чную со сла́вою прия́та еси́.
Ра́дуйся, тоя́жде и на́м жи́зни присножела́ющая хода́таице; ра́дуйся, приле́жная о на́с к Бо́гу моли́твеннице.
Ра́дуйся, Варва́ро, неве́сто Христо́ва прекра́сная.
Конда́к 5.
Боготе́чной звезде́ была́ еси́ подо́бна, свята́я великому́ченице Варва́ро: бежа́щи бо пред отце́м твои́м, наставля́ла еси́ того́ та́инственне на пу́ть, веду́щий ко Пра́ведному Со́лнцу, от Де́вы возсия́вшему, Христу́ Бо́гу. Оба́че о́н душе́вныма ослепле́н очи́ма, а́бие и теле́сныма не узре́ тя́ пред собо́ю бежа́щую: ты́ бо сквозе́ ка́менную, тебе́ веле́нием Бо́жиим разступи́вшуюся, го́ру проше́дши, скры́лася еси́ от о́чию его́ в ка́менней пеще́ре, да от среды́ ка́мения, я́ко пти́ца, да́си гла́с Бо́гу, воспева́ющи: Аллилу́иа.
И́кос 5.
Ви́девше тя́ па́стырие, верху́ горы́ о́вцы пасу́щии, в ка́мени кры́ющуюся, дивля́хуся, глаго́люще: что́ сия́ слове́сная а́гница? Ко́его во́лка бе́гает? И се́ Диоско́р, па́че во́лка люте́йший, востече́ на го́ру, и тебе́ та́мо кры́ющуюся обре́т, и похи́тив за деви́ческия твоя́ власы́, влеча́ше ко своему́ до́му по жесто́кому пути́, на не́мже тя́, ве́рнии, срета́ем приве́тствии си́ми:
Ра́дуйся, младо́му еле́ню на гора́х арома́тских уподо́бившаяся; ра́дуйся, го́рняя, па́че до́льних, восхожде́ния в се́рдце твое́м полага́ющи, возлюби́вшая.
Ра́дуйся, избы́вшая поги́бельнаго идолослуже́ния ро́ва; ра́дуйся, на го́ру Тро́ическаго поклоне́ния восте́кшая.
Ра́дуйся, сквозе́ ка́мение проше́дшая, от каменносе́рдаго бе́гающи гоне́ния; ра́дуйся, среде́ ка́мения Ка́мень Христа́, утвержда́ющаго тя́, обре́тшая.
Ра́дуйся, в пеще́ру ка́менную вше́дшая, ви́дети Иису́са во гро́бе ка́менном бы́вша положе́нна; ра́дуйся, уже́ Того́ ви́дящая на престо́ле Сла́вы седя́ща.
Ра́дуйся, я́ко власы́ главы́ твоея́ за Христа́, храня́щаго, да и вла́с главы́ челове́ческия не поги́бнет, исто́ргани су́ть на земли́; ра́дуйся, я́ко ти́и от Христа́ изочте́ни су́ть ко увенча́нию на небеси́.
Ра́дуйся, власы́ твоя́ кро́вию до́ле, я́ко цвета́ми, обагри́вшая; ра́дуйся, заплете́ние власо́в твои́х окровавле́нных в вене́ц тебе́ златы́й обрати́вшая.
Ра́дуйся, Варва́ро, неве́сто Христо́ва прекра́сная.
Конда́к 6.
Пропове́дником богоно́сным, апо́столом Христо́вым, поревнова́вши дерзнове́нно, пред лице́м мучи́телей пропове́дала еси́ Христа́ И́стиннаго Бо́га: и Его́ ра́ди лю́тыя ра́ны, власяны́ми ру́бы и о́стрым чре́пием боле́зненно потира́емыя, му́жественно претерпе́ла еси́, свята́я Варва́ро. Та́же в темни́цу всажде́на, в не́й а́ки в черто́зе о Христе́ Иису́се ликова́ла еси́, пою́щи Ему́: Аллилу́иа.
И́кос 6.
Возсия́вый в се́рдце твое́м просвеще́ние и́стиннаго богоразу́мия, возсия́ и во очесе́х твои́х све́т Боже́ственнаго лица́ Своего́ Христо́с Госпо́дь: То́й бо, я́ко возлю́бленный тво́й Жени́х, в полу́нощи к тебе́, непоро́чней Свое́й неве́сте, в темни́цу прише́д, любе́зно тя́ посети́, от ра́н исцели́ и све́тлостию лица́ Своего́ неизрече́нно ду́шу твою́ возвесели́, на́с же, ве́рных, научи́ пе́ти тебе́ сицева́я:
Ра́дуйся, за страда́вшаго бие́ние Христа́ неща́дно бие́нная; ра́дуйся, бие́ния терпе́нием неви́димаго врага́ уби́вшая.
Ра́дуйся, я́звы Го́спода Твоего́ на те́ле твое́м носи́вшая; ра́дуйся, от все́х я́зв, Те́мжде Го́сподем, на те́ле твое́м исцеле́вшая.
Ра́дуйся, я́ко Са́м Госпо́дь, Све́т ми́ра, тебе́ в темни́це бы́вшей Себе́ яви́л е́сть; ра́дуйся, я́ко Са́м души́ и те́ла Вра́ч тебе́ больну́ю посети́л е́сть.
Ра́дуйся, чрез земну́ю темни́цу в небе́сный черто́г све́тло вше́дшая; ра́дуйся, от крове́й твои́х бра́чную тебе́ оде́жду истка́вшая.
Ра́дуйся, я́ко тобо́ю от мно́гих ра́н гре́шнии исцеля́ются; ра́дуйся, я́ко тобо́ю от все́х боле́зней с ве́рою тя́ призыва́ющии уздравля́ются.
Ра́дуйся, у́з грехо́вных ско́рая реши́тельнице; ра́дуйся, я́зв многозло́бных до́брая целе́бнице.
Ра́дуйся, Варва́ро, неве́сто Христо́ва прекра́сная.
Конда́к 7.
Хотя́щу безу́мному мучи́телю жела́ние свое́ улучи́ти, и еще́ покуша́ющемуся ласка́тельными словесы́ тебе́, свята́я Варва́ро, от И́стиннаго Бо́га отврати́ти ко преле́стным и́долом, ты́, я́ко му́драя де́ва, отвеща́ла еси́ тому́: пе́рвее тве́рдый адама́нт в мя́гкий во́ск претвори́ши, не́жели мене́ отврати́ши от Христа́ Бо́га моего́; Того́ бо, со Отце́м и Святы́м Ду́хом, Еди́наго И́стиннаго Бо́га испове́дую, сла́влю, хвалю́, и пою́ Ему́: Аллилу́иа.
И́кос 7.
Но́вую показа́ безчелове́чия я́рость зверообра́зный мучи́тель, егда́ тебе́, свята́я великому́ченице Варва́ро, повеле́ на дре́ве пове́сити, и ногтьми́ желе́зными те́ло твое́ строга́ти, и свеща́ми горя́щими твоя́ опаля́ти ре́бра, еще́ же и мла́том во главу́ тя́жко би́ти. Сие́ пачеесте́ственное терпе́ние твое́ благогове́йно воспомина́юще, похвала́ми блажи́м тя́ си́ми:
Ра́дуйся, я́ко пове́шена была́ еси́ на дре́ве, Христа́ ра́ди на Кресте́ распя́таго; ра́дуйся, стро́гана по ре́бром Иису́са ра́ди, копие́м в ре́бра прободе́ннаго.
Ра́дуйся, я́ко о́гнь любве́ к Бо́гу в се́рдце твое́м возжегла́ еси́; ра́дуйся, я́ко за Того́ о́гненными свеща́ми пали́ма была́ еси́.
Ра́дуйся, тверде́йшая адама́нта в терпе́нии невреди́мом; ра́дуйся, крепча́йшая ка́меннаго столпа́ в му́жестве непоколеби́мом.
Ра́дуйся, я́ко мла́том, би́вшим тя́ по главе́, вене́ц Ца́рствия тебе́ искова́ся; ра́дуйся, я́ко те́мже мла́том глава́ врага́ твоего́ сокруши́ся.
Ра́дуйся, я́ко со Христо́м, Его́ ра́ди, на земли́ страда́ла еси́; ра́дуйся, я́ко с Ни́м и о Не́м на небеси́ прославля́ешися.
Ра́дуйся, все́х враго́в на́ших кре́пкая победи́тельнице; ра́дуйся, во все́х беда́х на́ших ско́рая помо́щнице.
Ра́дуйся, Варва́ро, неве́сто Христо́ва прекра́сная.
Конда́к 8.
Стра́нное и стра́шное святы́я Варва́ры страда́ние ви́дящи, благове́рная в жена́х Иулиани́я удиви́ся зело́, ка́ко млада́ отрокови́ца в ю́ностнем телеси́ таковы́я му́жественно за Христа́ терпи́т му́ки? Та́же, сле́знаго испо́лнившися умиле́ния, благода́рственно и та́ возопи́ Христу́ Бо́гу: Аллилу́иа.
И́кос 8.
Ве́сь Сладча́йший Иису́с сла́дость, ве́сь жела́ние тебе́ бы́сть, свята́я Варва́ро; сла́дце бо Его́ ра́ди го́рькия терпе́ла еси́ му́ки, глаго́лющи: ча́шу страда́ний, ю́же даде́ ми́ Возлю́бленный мо́й Жени́х, не и́мам ли пи́ти? Те́мже и сама́ показа́лася еси́ ча́ша, сла́дость чуде́сных исцеле́ний излива́ющая все́м вопию́щим к тебе́ сицева́я:
Ра́дуйся, отве́ргшая во а́дское го́ре и́дольскую го́ресть; ра́дуйся, возлюби́вшая небе́сную Иису́сову сла́дость.
Ра́дуйся, мы́сленная ста́мно, ма́нну бра́шна творе́ния во́ли Бо́жия в себе́ иму́щая; ра́дуйся, ве́рных во благи́х жела́ние исполня́ющая.
Ра́дуйся, реко́ испо́лненная благода́ти Бо́жия вода́ми; ра́дуйся, исто́чниче, кипя́щий чуде́с излия́нии.
Ра́дуйся, я́ко пчела́, от злово́ннаго и́дольских же́ртв ды́ма отлете́вшая; ра́дуйся, во благоуха́нную ми́ра Христо́ва воню́ сла́дце прите́кшая.
Ра́дуйся, я́ко твои́ми во все́м те́ле я́звами была́ еси́ подо́бна со́ту; ра́дуйся, я́ко кро́ве твоея́ ка́пли сладча́йшия па́че ме́да бы́ша Пресла́дкому Иису́су.
Ра́дуйся, я́ко все́м ве́рным воспомина́ние твое́ пресла́дко; ра́дуйся, я́ко все́й Це́ркви Христо́вой и́мя твое́ прече́стно.
Ра́дуйся, Варва́ро, неве́сто Христо́ва прекра́сная.
Конда́к 9.
Все́ естество́ а́нгельское ве́лиею возра́довася ра́достию, узре́вши му́жественную кре́пость твою́, свята́я и непобеди́мая му́ченице Варва́ро: ви́девше бо а́нгельстии чи́нове ве́тхаго врага́, прего́рдаго кня́зя тмы́, со все́м его́ бесо́вским и и́дольским по́лчищем от тебе́, еди́ныя млады́я де́вы, посра́мленнаго, побежде́ннаго же и под но́зе твои́ пове́рженнаго, ве́лиим гла́сом возопи́ша Бо́гу: Аллилу́иа.
И́кос 9.
Вети́и многовеща́ннии ри́торскими свои́ми язы́ки не возмо́гут изрещи́ вели́чества твои́х боле́зненных страда́ний, о Варва́ро! Кто́ бо ска́жет боле́знь твою́, коли́ка бе́, егда́ сосца́ твоя́ уре́зана бы́ша? Кто́ изрече́т сту́д лица́ деви́ческаго, егда́ обнаже́на по всему́ гра́ду от беззако́нных мучи́телей води́ма была́ еси́? Сицеву́ю боле́знь и безче́стие твое́ мы́ то́чию воспомяну́вше, содрога́емся и со умиле́нием глаго́лем си́це:
Ра́дуйся, до́брая ле́торасле са́да Иису́сова; ра́дуйся, и́стинная лозо́ виногра́да Христо́ва.
Ра́дуйся, два́ сосца́ твоя́ отре́занная, а́ки два́ гре́зна в че́сть Го́сподеви твоему́ прине́сшая; ра́дуйся, кро́вь твою́, а́ки вино́ умиле́ния, от те́х источи́вшая.
Ра́дуйся, я́ко Христа́ ра́ди обнаже́ннаго и ты́ ри́з твои́х совлече́на была́ еси́; ра́дуйся, я́ко Его́ ра́ди, во Иерусали́ме руга́тельне води́маго, и ты́ по гра́ду на поруга́ние води́ма была́ еси́.
Ра́дуйся, от а́нгела све́тлою оде́ждою в наготе́ твое́й оде́янная; ра́дуйся, то́ю от сту́дных оче́с неви́димо покрове́нная.
Ра́дуйся, чу́дный а́нгелом и челове́ком позо́р бы́вшая; ра́дуйся, и саме́х мучи́телей терпе́нием твои́м удиви́вшая.
Ра́дуйся, я́ко Са́м Госпо́дь свы́ше призре́ на твоя́ страда́ния; ра́дуйся, я́ко Са́м То́й Подвигополо́жник похвали́ по́двиги твоя́.
Ра́дуйся, Варва́ро, неве́сто Христо́ва прекра́сная.
Конда́к 10.
Спасти́ хотя́ ду́шу твою́, о те́ле твое́м вся́чески неради́ла еси́, свята́я Варва́ро: егда́ бо на тя́ ме́чное на сме́рть осужде́ние изы́де, ты́ под ме́чь о́стрый, а́ки под вене́ц, кра́сный, ра́достно иду́щи, Бо́гу, в му́ченическом по́двизе тебе́ укрепля́ющему, воспева́ла еси́ пе́снь: Аллилу́иа.
И́кос 10.
Стены́ ка́менныя тве́рдее окамене́нный се́рдцем бы́сть Диоско́р, тво́й, свята́я Варва́ро, не уже́ роди́тель, но лю́тый мучи́тель: то́й бо, я́ко услы́ша твое́ ме́чное на сме́рть осужде́ние, не то́чию о сме́рти твое́й не поболе́, но и са́м свои́м мече́м на ме́сте осужде́ния твою́ святу́ю усече́ главу́, и та́ко, по предрече́нию Госпо́дню, окая́нный оте́ц предаде́ на сме́рть свое́ ча́до. В то́й у́бо блаже́нней твое́й кончи́не приими́ от на́с пе́ния сия́:
Ра́дуйся, за главу́ Це́ркве — Христа́ под ме́чь главу́ твою́ прекло́ншая; ра́дуйся, за любо́вь к небе́сному человеколюби́вому Отцу́ Безсме́ртному на сме́рть от земна́го безчелове́чнаго отца́ тле́ннаго пре́данная.
Ра́дуйся, тече́ние му́ченическаго пути́ сконча́вшая до́бре; ра́дуйся, ве́ру безсме́ртному Обру́чнику Христу́ до сме́рти сохра́ншая бо́дре.
Ра́дуйся, си́лою свы́ше на бра́нь проти́ву си́л преиспо́дних препоя́санная; ра́дуйся, победоно́сною сла́вою в вы́шних от Христа́ Победи́теля оде́янная.
Ра́дуйся, ору́жием благоволе́ния Бо́жия венча́нная на земли́; ра́дуйся, цве́том нетле́ния украше́нная на небеси́.
Ра́дуйся, де́вам добро́то и похвале́ние; ра́дуйся, му́чеником красото́ и ра́дование.
Ра́дуйся, христиа́ном кре́пкое прибе́жище; ра́дуйся, ве́рным тве́рдое заступле́ние.
Ра́дуйся, Варва́ро, неве́сто Христо́ва прекра́сная.
Конда́к 11.
Пе́ние на́ше похва́льное, а́ще бы и тмочи́сленное, ве́мы, я́ко не́сть дово́льно по достоя́нию восхвали́ти тя́, свята́я и всехва́льная му́ченице Варва́ро; оба́че мы́, Бо́жиих тобо́ю на́м оби́льно подава́емых дарова́ний благода́рни су́ще, Бо́гу, в тебе́ Свои́ми благодея́нии прославля́емому, благода́рственными усты́ пое́м: Аллилу́иа.
И́кос 11.
Светоприе́мную свещу́, на небе́сном све́щнице пред престо́лом Святы́я Тро́ицы поста́вленную, зри́м у́мныма очи́ма тебе́, свята́я де́во Варва́ро: отону́дуже, егда́ нощны́й грехо́в на́ших мра́к луча́ми моли́тв твои́х просвеща́еши и на́с на све́тлую спасе́ния стезю́ наставля́еши, по до́лгу досто́йна еси́ от на́с зва́нием бы́ти почита́ема си́м:
Ра́дуйся, светоу́мная луче́, во све́тлость немерца́ющую прилуче́нная; ра́дуйся, мы́сленная денни́це, де́нь невече́рний озаря́ти возше́дшая.
Ра́дуйся, благово́нная сми́рно, Це́рковь Христо́ву благоуха́ющая; ра́дуйся, злата́я кади́льнице, фимиа́м моли́твы о на́с к Бо́гу принося́щая.
Ра́дуйся, мирополо́жнице исцеле́ний неоску́дная; ра́дуйся, сокро́вище Бо́жиих даро́в неиждиви́тельное.
Ра́дуйся, ча́ше, от оби́лия до́му Бо́жия че́рплющая ра́дость; ра́дуйся, сосу́де, от исполне́ния Христо́ва прие́млющий все́х бла́г небе́сных сла́дость.
Ра́дуйся, адама́нте, пе́рстень безсме́ртнаго со Христо́м обруче́ния украси́вый; ра́дуйся, ве́нче добро́ты, в руце́ Госпо́дней держи́мый.
Ра́дуйся, я́ко на тя́ Ца́рь Сла́вы, Госпо́дь си́л, сла́ву и велеле́пие возложи́л е́сть; ра́дуйся, я́ко тебе́ Ца́рь ца́рствующих и Госпо́дь госпо́дствующих Ца́рство Свое́ и госпо́дствие дарова́л е́сть.
Ра́дуйся, Варва́ро, неве́сто Христо́ва прекра́сная.
Конда́к 12.
Благода́ть от Бо́га дана́ ти́ е́сть, храни́ти и соблюда́ти от внеза́пныя боле́зни и на́глыя сме́рти вся́каго челове́ка, ве́рою, любо́вию и благогове́нием честна́я твоя́ страда́ния воспомина́ющаго и почита́ющаго; тоя́ благода́ти не лиши́ и на́с, до́брая де́во Варва́ро, да и мы́, здра́ви су́ще те́лом и ду́хом в ны́нешней и бу́дущей жи́зни о тебе́ пое́м Бо́гу: Аллилу́иа.
И́кос 12.
Пое́м твоя́ кре́пкия по́двиги, почита́ем страда́ния, хва́лим долготерпе́ние, ублажа́ем святу́ю твою́ кончи́ну, сла́вим твое́ в немощно́м те́ле показа́вшееся непобеди́мое му́жество, и́мже на земли́ и на небеси́ просла́вилася еси́, свята́я и добропобе́дная великому́ченице Варва́ро, и в че́сть твои́х победоно́сных по́двигов и страда́ний похва́льная воспису́ем ти́ сия́:
Ра́дуйся, от а́нгельских чино́в в сожи́тельство и́х любе́зно прия́тая; ра́дуйся, от де́вственных лико́в в черто́г небе́сный ра́достно введе́нная.
Ра́дуйся, от му́ченических полко́в под вене́ц сла́вы провожда́емая во гла́се ра́дования; ра́дуйся, от все́х жи́телей небе́сных прие́мшая о Го́споде целова́ние.
Ра́дуйся, я́ко мзда́ твоя́ мно́га е́сть на небесе́х; ра́дуйся я́ко ра́дость твоя́ ве́чна е́сть во све́тлости святы́х.
Ра́дуйся, от вра́г ви́димых и неви́димых кре́пкая на́м засту́пнице; ра́дуйся, ра́дости на́м, благода́ти же и сла́вы ве́чныя хода́таице.
Ра́дуйся, душе́вных и теле́сных неду́гов на́ших цели́тельнице; ра́дуйся, спаси́тельных бла́г земны́х и небе́сных пода́тельнице.
Ра́дуйся, я́ко тобо́ю от неча́янныя и ве́чныя сме́рти сохране́ни бы́ти упова́ем; ра́дуйся, я́ко тобо́ю ве́чную жи́знь улучи́ти благонаде́жно ча́ем.
Ра́дуйся, Варва́ро, неве́сто Христо́ва прекра́сная.
Конда́к 13.
О, многострада́льная и всехва́льная свята́я великому́ченице Варва́ро! Ны́нешнее на́ше моле́ние прие́мши, от вся́ких боле́зней душе́вных и теле́сных, и вра́г ви́димых и неви́димых на́с изба́ви, и от ве́чнаго муче́ния твои́м богоприя́тным хода́тайством сохрани́, да с тобо́ю на земли́ живы́х во ве́ки пое́м Бо́гу: Аллилу́иа. ТРИЖДЫ
И́кос 1.
А́нгелов честну́ю и вселюбе́зную чистоту́ непоро́чно сохра́нши, честна́я Варва́ро, а́нгелом сожи́тельница бы́ти сподо́билася еси́, с ни́миже егда́ пое́ши тро́ическую пе́снь Бо́гу на небеси́, услы́ши на́с, пою́щих тебе́ на земли́ похва́льная пе́ния сия́:
Ра́дуйся, отрокови́це, Бо́гом Отце́м предуста́вленная бы́ти сообра́зна в страда́нии о́бразу Сы́на Его́; ра́дуйся, Сы́ном Бо́жиим, Све́том от Све́та, призва́нная из тмы́ в чу́дный све́т ве́ры и благода́ти Его́.
Ра́дуйся, я́ко позва́вшему тя́ Свято́му Ду́ху, и сама́ те́лом и ду́хом свята́ еси́; ра́дуйся, я́ко от скве́рны пло́ти и ду́ха непоро́чну тя́ соблюла́ еси́.
Ра́дуйся, рожде́нному от Де́вы Жениху́ Христу́ де́ву тя́ чи́стую обручи́вшая; ра́дуйся, земна́го обру́чника па́че Небе́снаго зна́ти не восхоте́вшая.
Ра́дуйся, кри́не де́вства, посреде́ те́рния и́дольскаго прора́стший до́ле; ра́дуйся, цве́те чистоты́, в неувяда́емой сла́ве цвету́щий горе́.
Ра́дуйся, в небе́сном вертогра́де Христо́ва благоуха́ния наслажда́ющаяся; ра́дуйся, Красне́йшаго па́че сыно́в челове́ческих зре́нием та́мо утеша́ющаяся.
Ра́дуйся, убели́вшая ри́зы твоя́ в Кро́ви А́гнчей на земли́; ра́дуйся, в ли́це де́вственном после́дующая Бо́жиему А́гнцу на небеси́.
Ра́дуйся, Варва́ро, неве́сто Христо́ва прекра́сная.
Конда́к 1.
Избра́нной Бо́гом от идолослужи́тельнаго ро́да и призва́нной во язы́к свя́т, в лю́ди обновле́ния, неве́сте Христо́ве, я́ко избавля́ющиися тобо́ю от разли́чных зо́л и обстоя́ния, благода́рственная пе́ния и хвале́ния воспису́ем ти́, моли́твенницы твои́, свята́я и всехва́льная великому́ченице: ты́ же, иму́щи дерзнове́ние ко Го́споду, от вся́ких на́с бе́д свободи́, да с ра́достию зове́м ти́:
Ра́дуйся, Варва́ро, неве́сто Христо́ва прекра́сная.
Моли́тва ко святе́й великому́ченице Варва́ре.
Свята́я сла́вная и всехва́льная великому́ченице Христо́ва Варва́ро! Со́браннии дне́сь в хра́ме твое́м Боже́ственном лю́ди, и ра́це моще́й твои́х покланя́ющиися и любо́вию целу́ющии, страда́ния же твоя́ му́ченическая, и в ни́х Сама́го Страстополо́жника Христа́, да́вшаго тебе́ не то́чию е́же в Него́ ве́ровати, но и е́же по Не́м страда́ти, похвала́ми ублажа́ющии, мо́лим тя́, изве́стная жела́ния на́шего хода́таице: моли́ с на́ми и о на́с умоля́емаго от своего́ благоутро́бия Бо́га, да ми́лостивно услы́шит на́с, прося́щих Его́ благосты́ню, и не отста́вит от на́с вся́ ко спасе́нию и житию́ ну́ждная проше́ния, и да́рует христиа́нскую кончи́ну животу́ на́шему безболе́зненну, непосты́дну, ми́рну, Боже́ственных Та́ин прича́стну, и все́м на вся́ком ме́сте, во вся́кой ско́рби и обстоя́нии, тре́бующим Его́ человеколю́бия и по́мощи, вели́кую Свою́ пода́ст ми́лость, да благода́тию Бо́жиею и твои́м те́плым предста́тельством, душе́ю и те́лом всегда́ здра́ви пребыва́юще, сла́вим ди́внаго во святы́х Свои́х Бо́га Изра́илева, не удаля́ющаго по́мощи Своея́ от на́с всегда́, ны́не и при́сно и во ве́ки веко́в. Ами́нь.
Моли́тва втора́я ко святе́й великому́ченице Варва́ре.
Прему́драя и всекра́сная свята́я великому́ченице Христо́ва Варва́ро! Блаже́нна еси́, я́ко преми́рная му́дрости Бо́жия пло́ть и кро́вь не яви́ тебе́, но Са́м Бо́г Оте́ц Небе́сный, И́же тебе́, ве́ры ра́ди от неве́рнаго отца́ оста́вленную, изгна́нную и умерщвле́нную, в дще́рь Себе́ возлю́бленную прия́т: за тле́нное земна́го име́ния насле́дие пло́ти нетле́ние дарова́; труды́ му́ченическия упокое́нием небе́снаго измени́ Ца́рствия; вре́менное твое́ житие́, сме́ртию Его́ ра́ди пресече́нное, сицево́ю возпросла́ви по́честию, я́ко ду́шу с ли́ки небе́сных вчини́ духо́в, те́ло же, на земли́ в хра́ме и́х а́нгельском положе́нное, а́нгелом запове́да сохрани́ти це́ло, че́стно и многочуде́сно. Блаже́нна еси́, Христу́ Сы́ну Бо́жию, Жениху́ небе́сному уневеще́нная де́во, Его́же добро́ты твоея́ рачи́теля име́ти жела́ющи, всю́ себе́ страда́нием, ра́нами, у́дов ре́занием и са́мыя главы́ усече́нием, а́ки у́тварьми дража́йшими потща́лася еси́ украси́ти; да та́ко, я́ко жена́ ве́рна главе́ свое́й му́жу, Христу́ ду́хом и те́лом соедини́шися неразлу́чно, глаго́лющи: обрето́х, Его́же возлюби́ душа́ моя́, удержа́х Его́, и не оста́вих Его́. Блаже́нна еси́, я́ко Святы́й Ду́х на тебе́ почи́л е́сть, и́мже духо́вными духо́вная разсужда́ти науче́на, вся́ ду́хи лука́вствия во и́долах, я́ко па́губныя отри́нула еси́, и еди́наго Бо́га Ду́ха позна́вши, я́ко и́стинная покло́нница, ду́хом и и́стиною кла́нятися изво́лила еси́, пропове́днически глаго́лющи: Тро́ицу чту́, еди́но Божество́. Сию́ Святу́ю Тро́ицу, Ю́же в животе́ и сме́рти испове́данием и страда́нием свои́м просла́вила еси́, умоли́ о мне́, предста́тельнице моя́, я́ко да и а́з всегда́ тро́йственною, ве́ры, любве́ и наде́жды, ту́южде Святу́ю Тро́ицу почита́ю доброде́телию. И́мам свети́льник ве́ры, но пра́зден благи́х де́л еле́я, ты́, му́драя де́во, страда́льческую пло́ть твою́, кро́ве испо́лненну и ра́нами прелива́ющуся, а́ки свети́льник иму́щая, да́ждь от еле́я твоего́, да те́м душе́вную мою́ свещу́ украси́вши, сподо́блюся по тебе́ вни́ти в черто́г небе́сный. Пресе́льник а́з е́смь на земли́ и пришле́ц, я́коже вси́ отцы́ мои́; бла́г ве́чных насле́днице и, блаже́нная, обе́да в Ца́рствии небе́сном прича́стнице, я́ко в стра́нствии жития́, трапе́зы боже́ственныя угоще́ния, си́це и во исхо́де от ми́ра, жела́емаго сподо́би мя́ напу́тствования; и егда́ в коне́ц сно́м сме́рти начну́ усыпа́ти, косни́ся тогда́ изнемога́ющия пло́ти моея́, я́ко иногда́ а́нгел Илии́, глаго́лющи: воста́ни, я́ждь и пи́й, я́ко да благода́тию боже́ственных Те́ла и Кро́ве та́ин укрепле́н, преиду́ в кре́пости я́ди тоя́ дале́кий пу́ть сме́рти, да́же до горы́ небе́сныя; и та́мо, Его́же ты́ чрез три́ о́кна ба́нныя пре́жде ве́рою Бо́га Тро́ицу узре́ла еси́, Сего́ ку́пно с тобо́ю лице́м к лицу́ да удосто́юся ви́дети, и сла́вити Его́ в несконча́емыя ве́ки, ами́нь.
